සතිමත් බව පුහුණු කිරීමෙන් ඔබේ මානසික ආතතිය නැති කල හැකි බව ඔබ දන්නවාද?
අපගේ සිතුවිලි, හැඟීම්, කායික සංවේදනයන් සහ අවට පරිසරය කෙරෙහි මොහොතින් මොහොත දැනුවත්බව පවත්වා ගැනීම සතිමත්බව යනුවෙන් හදුන්වනු ලැබේ. තවත් විදියකින් කිවහොත් සතිමත්බව යනු වර්තමාන මොහොත වෙත නැවත නැවත සිත ගෙන ඒමේ පුරුද්දයි.
අප උත්සාහ කරන්නේ විනිශ්චයකින් තොරව වර්තමාන මොහොත කෙරෙහි අවධානය යොමු කිරීමටයි. මේ මොහොතේ අප ශරීරයේ සහ මනසෙහි සිදුවෙමින් පවතින දේ කෙරෙහි අවධානය යොමු කිරීමට පුරුදු වන විට, බොහෝ සිතුවිලි මනස තුල ජනනය වන බව ඔබට පෙනී යනු ඇත. මෙම සිතුවිලි නිසා මනස නිරන්තරයෙන් අතීතයට හෝ අනාගතයට යෑම ස්වාභාවිකයි – මනස විසුරුණු බව දැනගත් වහාම ඔබ කලයුතු වන්නේ වර්තමාන මොහොතට සිනහ මුසු මුහුණින් නැවතත් පැමිණීමයි. එය ඉතා සරල එහෙත් කිරීමට අපහසු කටයුත්තකි.
වාහනයක් පැදවීම, පිහිනීම, අලුතින් භාෂාවක් ඉගෙනීම ආදී දෑ පැයකින්, දවසකින් හෝ සතියකින් ඉගෙනීමට නොහැක. එහෙත් දිනපතා හැකිපමනින් අප පුරුදු පුහුණු උවහොත් කාලයත් සමාගම අපට මේවා ස්වාභාවික දේවල් වනු ඇත. සතිමත් බවත් එසේමයි.
හුස්ම ඔබේ හොඳම මිතුරා වේ.
සතිමත් බව පුහුණු කිරීමට උපයෝගී කළහැකි සරලම මෙවලම හුස්මයි. සෙමින් නාසය හරහා ගැඹුරින් හුස්ම ගන්න. හුස්ම ගැනීමේදී උදරය සම්පූර්ණයෙන් ප්‍රසාරණය වන බව, ඔබේ පෙණහලුවල පහළ කොටස්වලට වාතය ගමන් කරන බව ඔබට දැනේවි. හුස්ම පිටකිරීමේදී නාස්පුඩු හරහා උණුසුම් වාතය පිටවන බව ඔබට දැනේවි.
5 වරක් පමණ මෙසේ සෙමෙන් – ගැඹුරින් හුස්ම ගන්න.
කැමතිනම් පහත සදහන් වාක්‍ය ඛණ්ඩය හිතින් මුමුනන්න. එය ඔබේ සිත තවත් තැම්පත් කිරීමට උපයෝගී වේවි. “හුස්ම ගනිද්දී මගේ ශරීරය සැහැල්ලු වනවා – හුස්ම පිටකරද්දී මගේ මනස සැහැල්ලු වනවා ”.
විද්‍යාත්මක පසුබිම: ඔබ ගැඹුරින් හුස්ම ගන්නා විට ඔබගේ රුධිර පීඩනය සහ හෘද ස්පන්දන වේගය අඩුවේ. එමෙන්ම ආතති හෝමෝන (කෝටිසෝල් සහ ඇඩ්‍රිනලින් වැනි) මුදා හැරීම අවම වන නිසා ශරීරයේ සහ මනසෙහි සැහැල්ලු ගතියක් නිරායාසයෙන්ම ඇතිවේ.
දරදඩු මාංශ පේශි ලිහිල් කිරීම.
දවස පුරා අපගේ සිතේ ඇති වන සෑම චිත්තවේගයක්ම අපගේ ශරීරයට බලපායි. මේවා තෙහෙට්ටුව, කොන්දේ වේදනාව, හිසරදය, බඩේ කැක්කුම ආදී ලෙස අපට ශරීරයෙන් පිලිබිබු වේ. සතිමත්ව ශරීර මාංශ පේශි ලිහිල් කිරීම මගින් ශරීරයේ සහ මනසේ තැම්පත්ව ඇති ආතතිය අඩු කිරීමට ඔබට පුළුවන.
ගැඹුරු හුස්මක් ගෙන කොටසින් කොටස හිතාමතා විවිධ මාංශ පේශි කණ්ඩායම් ලිහිල් කිරීමට මනසට අවසර දෙන්න.
ඔබේ ඇස් කෙරෙහි අවධානය යොමු කරන්න. ඒවා සැහැල්ලු කරන්න. ඔබේ කම්මුල් සහ හකු කෙරෙහි අවධානය යොමු කරන්න, සැහැල්ලු කරන්න. ඔබේ උරහිස් පරීක්ෂා කරන්න. ඒවා තද ද? උරහිස් වලටත් සැහැල්ලු වීමට ඉඩ දෙන්න. ඔබේ අත්, උකුල, පාද සහ ඔබේ අනෙකුත් මාංශ පේශි සෙමෙන් සීරුවේ පරීක්ෂා කරන්න – සැහැල්ලු කරන්න.
විද්‍යාත්මක පසුබිම: කෝටිසෝල් සහ ඇඩ්‍රිනලින් වැනි හෝමෝන නිසා නිරායාසයෙන්ම මාංශ පේශි තද වේ. ඔබේ මාංශ පේශි සතිමත්ව ලිහිල් කිරීමට ඉගෙන ගැනීමෙන්, ආතතිය දුරු කිරීමට ඔබේ ශරීරයම භාවිතා කිරීමට ඔබට හැකිවේ.
සතිමත්බව ප්‍රගුණ කිරීමෙන් කායික හා මානසික රෝග අවම වනවා පමණක් නොව ඔබගේ සෞඛ්‍ය, ආකල්ප සහ හැසිරීම් වල ද ධනාත්මක වෙනස්කම් සිදුවන බව මැසචුසෙට්ස් විශ්ව විද්‍යාලයේ – වෛද්‍ය මධ්‍යස්ථානයේ ආතති අඩු කිරීමේ සායනයේ නිර්මාතෘ සහ හිටපු අධ්‍යක්ෂ මහාචාර්ය ජෝන් කබට්-සින් පෙන්වාදෙයි.
තව සතිමත් මෙවලම් ඉගෙනගන්න www.YesWeCan.lk වෙත පිවිසෙන්න.